Noticias

  • Concursu d'idees empresariales pa estudiantes y titulaos

    02 de Febreru 2011

    Los ganadores van recibir un premiu en metálicu y sofitu pa la viabilidá de la so iniciativa

    La Universidá d'Uviéu y la Fundación FOLIE (Asociación de Mozos Empresarios del Principáu d'Asturies) punxeron en marcha'l concursu «Tengo una idea brillosa, ¿te interesa?». Una convocatoria empobinada a estudiantes y titulaos de la universidá asturiana de los últimos cuatro años que pueden convertir un proyectu nuna iniciativa empresarial vidable.

    Los participantes van tener qu'ellaborar una idea y esponela ante un xuráu empresarial que va valorar les propuestes a concursu. Aquelles que se consideren más orixinales, con mayor potencial y que tean meyor presentaes van optar a unu de los trés premios en metálicu de 3000, 2000 y 1000 euros, respectivamente. Amás, van recibir sofitu p'aportar a un posible financiamientu del proyectu.

    Conforme a les bases, contémplense dos modalidad de participación: por llibre o al traviés de la matriculación nel cursu d'estensión universitaria «Ferramientes pa la creatividá y desenvolvimientu de nuevos negocios». Esta segunda vía consiste nun programa formativu pensáu pa facilitar la presentación d'idees al concursu. Una vegada superáu'l cursu, podrá llograse la reconocencia de 4,5 creitos de llibre configuración y el reembolsu d'hasta un ochenta per cientu de les tases de matrícula. El plazu pa la inscripción, qu'hai de faese vía uniovi.es, remata en dambos casos el 23 de febreru.

    Esti certame ta impulsáu pol Vicerrectorado d'Estudiantes y Empléu, nel marcu del programa de Fomentu de la Cultura Entamadora del Principáu d'Asturies, y cuenta cola collaboración de la Fundación FOLIE y el patrociniu de la Cátedra de Mozos Entamadores Bancaja Universidá d'Uviéu.


Buscar