Noticias

  • Comunicáu sobre l'agrupamientu de fondos bibliográficos nel Campus de Xixón

    07 de Febreru 2014

    Ante l'agrupamientu de los fondos bibliográficos allugaos na sala d'estudiu del Edificiu Polivalente del Campus de Xixón na Biblioteca Central de dichu campus, l'equipu rectoral informa a la comunidá universitaria:

    • Nun hubo nin va haber nengún zarru d'instalaciones destinaes al usu de los estudiantes nel Campus de Xixón.
    • El serviciu de préstamu bibliotecariu ta garantizáu.
    • La Universidá dio en un agrupamientu de fondos bibliográficos, que nun supon l'amenorgamientu de los servicios de préstamu y consulta, nin la eliminación d'espacios d'estudiu.
    • La sala d'estudiu del Edificiu Polivalente va siguir abierta y el so zarru nun se consideró en nengún momentu. Esti espaciu cunta con 94 puestos de llectura y los 3.300 volumes de los que disponía van tar accesibles na Biblioteca Central del campus, allugada a 800 metros nel Aulariu Norte. Esta biblioteca cunta con 36.400 exemplares y dispon de 561 puestos d'estudiu. La so plantiya ta formada por un xefe de serviciu, dos bibliotecarios y cinco técnicos especialistes, qu'empresten los sos servicios en veces de mañana y tarde.
    • El préstamu bibliográficu de la sala de llectura del Edificiu Polivalente taba atendíu por un ayudante de biblioteca, que foi treslladáu a la biblioteca de la Facultá de Comerciu, Turismu y Ciencies Sociales Xovellanos, y un subalternu, xubiláu'l pasáu mes de xineru.
    • La Biblioteca de la Facultá de Comerciu, Turismu y Ciencies Sociales Xovellanos, allugada nel campus de Xixón, cuenta con 290 puestos d'estudiu, un fondu bibliográficu de 35.000 exemplares y ta atendida por una bibliotecaria, un ayudante de biblioteca (procedente de la sala d'estudios del Edificiu Polivalente) y dos técnicos especialistes.
    • El campus de Xixón dispon d'un serviciu de biblioteca universitaria con personal técnico fayadizu y suficiente pa ufiertar servicios de préstamu y bibliotecarios, y los puestos d'estudiu abondos p'atender toles necesidaes de los universitarios.
    • L'equipu de gobiernu de la Universidá d'Uviéu garantiza que les biblioteques del Campus de Xixón van siguir emprestando serviciu pa tola comunidá universitaria.

Buscar