Noticias

  • Científicos de la Universidá afayen bacteries productores de fármacos n'ecosistemes d'algues y corales del mar Cantábricu

    08 de Ochobre 2014

    Un equipu multidisciplinar confirma la presencia de actinomicetos en hábitats marinos y analiza el so potencial como productores d'antibióticos y antitumorales

    Parte del equipu d'investigación que trabayó nesti descubrimientu, n'unu de los llaboratorios de la área de Microbioloxía na Facultá de Medicina.

    Investigadores de la Universidá d'Uviéu afayaron bacteries productores de fármacos n'ecosistemes d'algues y corales del mar Cantábricu. El trabayu del equipu lideráu pola profesora Gloria Blanco va publicase na prestixosa revista Microbial Ecology. L'estudiu enmárcase dientro de les llínees d'investigación del Observatoriu Marín d'Asturies (OMA) sobre la esploración de la vida marina del Cantábricu y l'esplotación de los sos recursos naturales. El OMA inscríbese dientro de les iniciatives puestes en marcha dende'l Campus d'Excelencia Internacional.

    L'equipu científicu ta centráu nel estudiu de los actinomicetos, unos microorganismos esenciales pa la vida nel nuesu planeta y la salú humana, yá que son los principales productores d'antibióticos, antitumorales y otros fármacos que s'utilicen en medicina. Anque tradicionalmente consideráronse bacteries de suelu, nestos últimos años fíxose evidente la so presencia n'ambientes marinos y en simbiosis con otros seres vivos como animales y plantes.

    "Los océanos son na actualidá una fonte alternativa d'aislamientu de nuevos xéneros de actinomicetos, que'l so estudiu fácese bien curiosu debíu al creciente númberu de nuevos y potentes compuestos d'interés farmacolóxicu que producen", esplica Gloria Blanco. Esta llínea d'investigación inclúyese asina dientro de los nuevos enclinos de la comunidá científica internacional pal descubrimientu de nueves melecines. La hipótesis de trabayu básase na esploración de nuevos hábitats, con cuenta de llograr nueves especies o cepes que produzan molécules naturales con potencial farmacolóxicu.

    Los trabayos previos llevaos a cabu polos espertos dexaron atopar nel Cantábricu una gran diversidá de actinomicetos productores de molécules con actividaes antibiótiques y antitumorales, y que s'atopen acomuñaos a distintos organismos en distintos ecosistemes. Los primeros afayos de actinomicetos ficiéronse n'algues intermareales recoyíes en distintes sableres de Xixón dende 2010. Nesti últimu añu tamién se pudieron aisllar poblaciones bien variaes d'estes bacteries actinomicetos a partir d'algues submareales recoyíes en distintes estaciones de la mariña asturiana, un trabayu que se realiza en collaboración col Centru d'Esperimentación Pesquera del Principáu d'Asturies y el Departamentu d'Organismos y Sistemes de la Universidá.

    Identificada una nueva especie

    L'equipu de Gloria Blanco tamién tomó parte nuna de les campañes realizaes nel Cañón d'Avilés dientro del proyectu de DOSMARES, onde fueron descubiertos actinomicetos capaces de vivir nos petones coralinos hasta 4.700 m. de fondura. Les amueses recoyíes a 1.500 metros de fondura dexaron identificar una nueva especie de actinomiceto que vive acomuñada a corales y estrelles de mar, que foi denominada como Myceligenerans cantabricum y que yá foi depositada nes Colecciones de Cultivo Tipo española (CECT) y alemana (DSMZ).

    El trabayu, que se va publicar na prestixosa revista Microbial Ecology, dexó amás identificar una nueva especie que vive acomuñada a corales y estrelles de mar.

    "Dáu'l gran númberu de actinomicetos productores de compuestos bioactivos que s'aisllaron y, conociendo les necesidaes clíniques actuales de disponer de nueves melecines, faise prioritaria la profundización nesti estudiu pa determinar la posible novedá de los compuestos llograos, elucidar la so estructura química y valorar el so más que posible interés médicu-farmacéuticu", señala la profesora de Microbioloxía. Un grupu d'especialistes n'enfermedaes infeicioses del HUCA y l'Hospital de Cabueñes collabora nel analís de les actividaes antibiótiques de los productos naturales llograos nesti estudiu. El calter multidisciplinar de la investigación implicó a biólogos, químicos, médicos y biotecnólogos.

    Investigadores firmantes del artículu

    • Gloria Blanco (Área de Microbioloxía del Departamentu de Bioloxía Funcional)
    • Alfredo F. Braña (Área de Microbioloxía. Departamentu de Bioloxía Funcional)
    • Aida Sarmiento (Área de Microbioloxía. Departamentu de Bioloxía Funcional)
    • Verónica González (Área Microbioloxía. Departamentu de Bioloxía Funcional)
    • Luis A. García (Departamento Ingeniería Química y Tecnoloxía del Mediu Ambiente)
    • Herminio Nava (Área de Botánica)
    • José Luis Acuña (Área d'Ecoloxía)
    • Axayacatl Molina (Área d'Ecoloxía)
    • Hans-Peter Fiedler (Universidá de Tübingen, Alemaña)

    Otros investigadores del equipu

    • José Manuel Rico Ordás (Área d'Ecoloxía, Departamentu de Bioloxía d'Organismos y Sistemes)
    • Juan José Palacios (HUCA)
    • Jonathan Fernández (HUCA)
    • Fernando Vázquez (Área de Microbioloxía del Departamentu de Bioloxía Funcional-HUCA)
    • Luis Oteruo(Hospital de Cabueñes)
    • Andreas Kulik (Universidá de Tübingen, Alemaña)
    • Eva Llera (Centru d'Esperimentación Pesquera del Principáu)
    • Lucía García (Centru d'Esperimentación Pesquera del Principáu)

    Imaxe del banner de portada

    Vista al microscopiu de delles de les bacteries marines descubiertes.


Buscar