Noticias

  • Científicos de la Universidá d'Uviéu identifiquen un xen que causa avieyamientu aceleráu hereditariu

    05 de Mayu 2011

    L'estudiu, dirixíu por Carlos López-Otín y nel que tamién participen investigadores del IUOPA y el IMOMA, secuencia per primer vegada'l xenoma d'una familia española pa identificar la causa d'una enfermedá rara y describe un nuevu tipu de progeria.

    Un estudiu basáu na secuenciación del xenoma de pacientes españoles con avieyamientu aceleráu dexó identificar una nueva forma hereditaria d'esta enfermedá y afayar el xen mutante responsable del so desenvolvimientu. Esta investigación, que publicase güei na prestixosa revista American Journal of Human Genetics, ye la primera d'esti tipu llevada a cabu nel nuesu país y apurre nueves claves alrodiu de los mecanismos moleculares del avieyamientu humanu.

    "L'avieyamientu ye un procesu bien complexu qu'afecta a la mayor parte de les funciones biolóxiques d'un organismu, pero que les sos causes moleculares entá se desconocen en gran midida", esplica'l doctor Carlos López-Otín, catedráticu de Bioquímica y Bioloxía Molecular de la Universidá d'Uviéu, y director del estudiu. "Mientres los últimos años, la nuesa conocencia de los mecanismos moleculares responsables del avieyamientu humanu amontóse gracies al estudiu d'un grupu d'enfermedaes rares denominaes progerias, que provoquen l'avieyamientu aceleráu de los pacientes".

    L'estudiu foi lleváu a cabu por científicos de la Universidá d'Uviéu, del Institutu Universitariu d'Oncoloxía del Principáu d'Asturies y del Institutu de Medicina Oncolóxica y Molecular d'Asturies, y describe un nuevu tipu de progeria en dos families españoles. "A partir de los dos años d'edá, los dos pacientes estudiaos empezaron a presentar evidentes signos d'avieyamientu aceleráu, ente los que destacaben especialmente los problemes óseos", describe'l doctor Rubén Cabanillas, del Institutu de Medicina Oncolóxica y Molecular d'Asturies. "La evaluación clínica detallada d'estos pacientes reveló que dambos teníen les mesmes alteraciones patolóxiques, pero nun se correspondíen esactamente con nenguna enfermedá conocida hasta'l momentu. Amás, dambos pacientes escarecíen de mutaciones nos dos xenes qu'hasta la fecha describiérense como responsables d'enfermedaes asemeyaes", señala.

    Pa tratar d'identificar l'alteración xenética responsable d'esta nueva enfermedá, los investigadores secuenciaron tola parte del xenoma codificante de proteínes d'unu de los pacientes lo mesmo que de los sos padres. "Les nueves técniques de secuenciación déxennos llevar a cabu esti tipu d'estudios, que fai apenes tres años yeren impensables", comenta'l doctor Xosé Antón Puente, profesor de la Universidá d'Uviéu. La secuenciación del xenoma d'esta familia dexó identificar una mutación nun xen denomináu BANF1, qu'hasta'l momentu nun se describiera como responsable de nenguna enfermedá.

    L'estudiu molecular del paciente de la segunda familia dexó confirmar la presencia d'esactamente la mesma mutación nel so xenoma. Estudios adicionales dexaron demostrar qu'esta mutación provoca un gran amenorgamientu de los niveles de la proteína codificada pol xen BANF1, lo que da llugar a defectos na envoltura nuclear. Esta estructura ye la cubierta qu'envolubra'l núcleu d'una célula, onde s'atopa l'ADN, polo que la so alteración provoca numberosos cambeos nel organismu. Finalmente, el trabayu tamién demostró que la introducción del xen normal nes célules aisllaes d'estos pacientes ye abondu pa recuperar la estructura correcta de la envoltura nuclear.

    Estudios previos demostraren que la mutación d'otros xenes implicaos na formación de la envoltura nuclear, como los denominaos LMNA o ZMPSTE24, provoquen el desenvolvimientu d'otros síndromes d'avieyamientu aceleráu. Estos trabayos dexaron al grupu de la Universidá d'Uviéu diseñar un tratamientu pa la progeria de Hutchinson-Gilford que na actualidá ta ensayándose en pacientes de too el mundu. Por ello, el doctor López-Otín señala: "ye posible que'l descubrimientu del xen mutáu responsable d'esti nuevu síndrome d'avieyamientu aceleráu dexe'l futuru desenvolvimientu de dalgún aproximamientu terapéuticu pa estos pacientes. Sía que non, el trabayu qu'agora publicamos reafita la gran utilidá de la secuenciación de xenomes pal estudiu d'enfermedaes rares ya ilustra l'enorme potencial d'esta tecnoloxía p'afondar na conocencia de la bioloxía humana".

    El trabayu nes instituciones participantes nesti proyectu ta financiáu pol Ministeriu de Ciencia ya Innovación, la Obra Social Cajastur y les Fundaciones FICYT, María Cristina Masaveu Peterson, Centru Médicu d'Asturies y Marcelino Botín.

    Fonte: FICYT


Buscar