Noticias

  • Científicos de la Universidá d'Uviéu contribúin a descifrar el xenoma del orangután

    26 de Xineru 2011

    Les resultancies, que publica Nature en portada, apurren nueves claves pa entender la evolución de los homínidos

    Investigadores del Institutu d'Oncoloxía de la Universidá d'Uviéu, pertenecientes al equipu lideráu por Carlos López-Otín, y del Institut de Biologia Evolutiva (UPF-CSIC) de Barcelona contribuyeron a descifrar el xenoma del orangután, l'homínidu más alloñáu del ser humanu con quien compartió un antepasáu común fai más de 12 millones d'años. Esti estudiu ye frutu de la collaboración de más de 30 llaboratorios de 7 países, coordinaos por Devin Locke de la Washington University (EE.UU).

    L'aportación española al trabayu, que ye portada na revista Nature, foi coordinada por Arcadi Navarro, catedráticu de Xenética de la Universidá Pompeu Fabra y Profesor d'Investigación ICREA del Institut de Biologia Evolutiva (UPF-CSIC); Tomás Marqués-Bonet, xefe del grupu de Xenómica de Primates del mesmu Institutu y Carlos López-Otín caderalgu de Bioquímica y Bioloxía Molecular de la Universidá d'Uviéu.

    La determinación de los más de trés mil millones de pares de bases que constitúin el xenoma del orangután sumir a la de los xenomes humanu y de chimpancé, secuenciaos enantes, y dexa llograr una visión más precisa del procesu evolutivu que dio llugar a l'apaición del ser humanu. La comparanza d'estos xenomes, con más d'un 97% d'identidaes ente humanu y orangután, amosó les distintes presiones evolutives a les que s'enfrentaron los antepasaos d'estos trés especies, y les notables diferencies nos cromosomes del orangután al respective de los demás homínidos. Coles mesmes, la comparanza de los dos especies d'orangután esistentes, de Borneo y de Sumatra, reveló la esistencia d'importantes cambeos poblacionales ente dambes. Asina, determinóse que mientres los postreros 400.000 años los orangutanes de Sumatra tuvieron una gran espansión poblacional, ente que los de Borneo esperimentaron un cayente. Sicasí, el númberu actual d'orangutanes de Sumatra ye enforma menor qu'el de los de Borneo, debíu fundamentalmente a factores derivaos de la intervención humana. La conocencia de les sos diferencies xenétiques podría ayudar nos esfuerzos de caltenimientu de dambes especies d'orangutanes que s'atopen en grave peligru d'estinción.

    Carlos López-Otín afirma: "L'estudiu comparativu detalláu de múltiples families de xenes nos xenomes humanu, de chimpancé y d'orangután indica que na evolución humana hubo una presión evolutiva importante sobre los sistemes inmune y reproductivo". Pela so parte, Arcadi Navarro señaló que "los estudios sobre la organización xenómica del orangután van dexar llograr información pervalible sobre los mecanismos de reorganizaciones cromosómicas que tienen llugar n'enfermedaes como'l cáncer".

    Contribución española
    La participación española nesti proyectu deriva del trabayu de el investigadores Tomás Marqués-Bonet de la Universidá de Washington en Seattle y el IBE (UPF-CSIC), Rui Faria, Olga Fernando, Fleur Darré, Domènec Farré, Elodie Gazave, Meritxell Oliva y Arcadi Navarro, del mesmu Institutu y Víctor Quesada, Xose S. Ponte, Gonzalo R. Ordóñez y Carlos López-Otín, de la Universidá d'Uviéu. El grupu del Dr. Navarro estudió la organización de los cromosomes del orangután al respective de otros homínidos, lo cual dexó reconstruyir dellos acontecimientos d'importancia na diferenciación de les distintes especies d'homínidos. Pela so parte el Dr. Marqués-Bonet lideró l'analís de duplicaciones y reorganizaciones estructurales en comparanza con otros homínidos. Amás, el grupu del Dr. López-Otín estudió en detalle diverses families de xenes frecuentemente acomuñaos con enfermedaes y qu'amuesen importantes diferencies ente humanos y orangutanes.

Buscar