Noticias

  • El Campus de Mieres inaugura la cai Rector Julio Rodríguez

    25 de Febreru 2011

    El rector, Vicente Gotor, y l'alcalde de Mieres, Luis María García, coinciden en que con esti actu sáldase "una delda pindia" col ex rector

    Autoridaes y familiares de Julio Rodríguez
    L'ex rector Julio Rodríguez cunta dende esta mañana con una cai nel Campus de Mieres. La cai, allugada ente l'edificiu Científicu-Tecnolóxicu y el nuevu Edificiu d'Investigación del complexu universitariu, foi inaugurada nun emotivu actu que cuntó cola presencia de la familia del que fuera rector de la Universidá d'Uviéu, ente los años 1996 y 2000, autoridaes polítiques y miembros de la comunidá universitaria.

    La Corporación municipal del Conceyu de Mieres alcordó'l pasáu 11 de febreru nun plenu estraordinariu dar el nome de Rector Julio Rodríguez Fernández a una cai del campus "en reconocencia al so papel nel desenvolvimientu de les instalaciones universitaries na ciudá". Miembros del equipu rectoral de Julio Rodríguez y de la comunidá universitaria, amás de representantes de los sindicatos mineros y la Corporación municipal, acompañaron nesti actu a la familia del ex rector: la so vilba, los sos fíos y nietos, y los sos hermanos.

    Tres el descubrimientu d'una placa en memoria del ex rector fináu en 2005, el so fíu, Julio Rodríguez, foi l'encargáu de pronunciar unes palabres en nome de la familia. Nel so discursu, recordó l'optimismu del so padre y el so enfotu contra vientu y marea en faer el campus en Mieres. "Fíxose un actu de xusticia, y trunfaron los que mientres seis año nun escaecistis del mio padre", indicó.

    La directora xeneral d'Universidaes, Miriam Cueto, intervieno en representación del Gobiernu del Principáu y aludió al actu d'inauguración de la cai como la reconocencia al entusiasmu, esfuerzu, trabayu ya iniciativa del rector Julio Rodríguez", que defendió una iniciativa con clara visión de futuru.

    L'alcalde de Mieres, Luis María García, recordó los entamos d'una idea –la creación del campus de Mieres—que tenía "muncho más de voluntarismu que de posibilidaes práctiques". Pero foi posible, indicó, gracies a la ilusión y enfotu" de Julio Rodríguez. La concesión del nome a la cai, tomada por unanimidá per parte de la Corporación municipal, ye'l pagu d'una delda que teníamos" col ex rector.

    El rector, Vicente Gotor, cerró l'actu con un discursu d'agradecimientu a les instituciones y de reconocencia al llabor desempeñáu por Julio Rodríguez na xestación d'un proyectu que nacía pa contribuyir al desenvolvimientu d'una contorna minera castigada pola reconversión. "Esta cai ye más qu'un homenaxe a un rector, yo entender como un xestu d'agradecimientu de la ciudadanía mierense". Julio Rodríguez, recordó, "sofitó en tou momentu'l proyectu del campus por convencimientu y porque creía firmemente en que sería una bona salida, seique la meyor, pa Mieres", precisó'l rector.

    Vicente Gotor repasó los entamos del proyectu, de la mano de los sindicatos mineros y cola collaboración de toles instituciones. "Alcordanza que mientres los peores momentos, nos que tuvo qu'aselar crítiques internes y batallar contra innumberables burocracies, siempres caltuvo que yera un deber de la Universidá responder a les demandes que la sociedá plantéga-y, y el Campus de Mieres –dicía Julio—nun ye namá un valor local, ye un bien pa la Universidá y p'Asturies".

    Esta cai simboliza, añedió'l rector, "la reconocencia a quien foi'l gran impulsor d'esti campus. Yera una delda pindia qu'agora cobra más sentíu, una vegada qu'aquella estensión de terrén qu'arrodiaba'l castillete mineru dexó pasu a un complexu universitariu al que tenemos de dar tiempu por que creza, espollete y algame les mires que'l pueblu de Mieres punxo dende un primer momentu nesti campus y na Universidá".

    Imaxes:


Buscar