Noticias

  • La Universidá d'Uviéu celebra la Selmana de Bienvenida' a estudiantes Erasmus

    05 de Setiembre 2011

    El programa inclúi actividaes docentes, lúdiques y culturales que se van desenvolver del 5 y al 10 de setiembre

    Los estudiantes Erasmus y Conveniu, nel Edificiu Históricu de la Universidá
    La Universidá d'Uviéu empecipió güei nel Campus d'El Milán les actividaes de la Selmana de Bienvenida pa estudiantes Erasmus o de conveniu internacional que se van enllargar hasta'l 10 de setiembre. L'oxetivu d'esta iniciativa ye empobinar a los estudiantes estranxeros que lleguen a Asturies y facilitar la so adaptación tantu a la Universidá como a les ciudaes con campus universitarios: Uviéu, Xixón y Mieres mientres les sos primeres selmanes d'estancia.

    La institución académica va recibir a lo llargo d'esti mes a 346 mozos que participen nel programa Erasmus nesti primer cuatrimestre, una cifra que supera en 30 alumnos a la rexistrada'l pasáu cursu nestes mesmes feches. A estos mozu sumaránse los qu'opten por cursar estudios na Universidá d'Uviéu nel segundu cuatrimestre. Polo que respecta al númberu d'estudiantes procedentes del programa Conveniu Específicu, enagora son 60 los matriculaos nel primer cuatrimestre.

    El programa d'actividaes de bienvenida ufierta sesiones emponedores sobre los campus y centros de la universidá, información práctica sobre trámites académicos y burocráticos, amás de distintes actividaes docentes, deportives y culturales. Los alumnos internacionales van poder asistir a clases de llingua española, empecipiase na cultura y la sociedá asturianes, según esfrutar de visites empuestes pa conocer los distintos campus universitarios, les sos instalaciones y les ciudaes d'Uviéu, Xixón y Mieres. Nesti últimu campus va tener llugar un maratón de baloncestu, fútbol sala, aeróbic, etc. nes instalaciones deportives de Barredo, el vienres, 9 de setiembre. La Selmana de Bienvenida va concluyir el domingu 11 con una visita a Cuadonga.

    Polo que respecta a les movilidaes salientes, más de 680 alumnos asturianos van cursar estudios nuna universidá estranxera al traviés del Programa Erasmus a lo llargo del cursu, ente que 61 van treslladase al traviés de Conveniu Específicu.

    Imaxes:


Buscar