Noticias

  • Investigadores de la Universidá topen bacteries con potencial terapéuticu nel agua de lluvia

    10 de Payares 2015

    Un equipu multidisciplinar llogra aisllar actinobacteries productores d'antibióticos y antitumorales en precipitaciones cayíes en Xixón y Uviéu

    Modelu de dispersión d'estos microorganismos per tierra, mar y aire

    Investigadores de la Universidá d'Uviéu consiguieron aisllar y cultivar bacteries con capacidaes potencialmente terapéutiques nes precipitaciones d'agua, xarazo y nieve. L'afayu d'estos recursos atmosféricos supon una fonte novedosa y inexplorada pal descubrimientu de nueves melecines. Asina lo indica Gloria Blanco, profesora de la Área de Microbioloxía del Departamentu de Bioloxía Funcional de la institución académica asturiana. Esta investigadora esplica que la principal fonte d'antibióticos y antitumorales ye la naturaleza, onde s'atopen unes bacteries denominaes actinobacteries, con potencial farmacolóxicu, sobremanera les especies del xéneru Streptomyces. Estos organismos, que mientres el sieglu XX considerábense esclusivos del mediu terrestre, viven tamién y de manera abondosa nos océanos.

    Yá en febreru de 2013 esti grupu de científicos de la Universidá d'Uviéu empezó a aisllar bacteries a partir d'amueses de precipitaciones atmosfériques recoyíes nes ciudaes de Xixón y Uviéu. A lo llargo d'estos trés últimos años, l'equipu de Gloria Blanco llogró cultivar nel llaboratoriu un gran númberu d'estos microorganismos llograos a partir de fontes atmosfériques. Los estudios confirmaron d'esta miente qu'estes bacteries, amás de vivir n'ambientes terrestres y marinos, pueden movese acomuñaes al ciclu hidrolóxicu. Gloria Blanco destaca'l "evidente interés" d'estos descubrimientos daes les necesidaes médiques actuales.

    L'afayu d'estes actinobacteries en precipitaciones atmosfériques tien amás un valor ecolóxicu agregu. Esti equipu d'investigadores propunxo un modelu de dispersión d'estos microorganismos per tierra, mar y aire siguiendo'l ciclu hidrolóxicu del planeta. El puntu clave na so hipótesis, según la profesora del Departamentu de Bioloxía Funcional, ta na xeneración de los aerosoles marinos que formen les nubes y que, nesti procesu, llévense consigo bacteries que van ser darréu tremaes por continentes y océanos de la Tierra. Estos trabayos fueron apocayá publicaos na revista Microbial Ecology.

    Los científicos señalen qu'estos recursos atmosféricos suponen una fonte novedosa y inexplorada pal descubrimientu de melecines

    La llínea d'investigación d'esti equipu multidisciplinar, integráu por biólogos, biotecnólogos, químicos y médicos, céntrase na busca de nuevos antibióticos y antitumorales a partir de hábitats naturales primeramente inexplorados. La profesora Blanco destaca que, ante'l creciente problema de les resistencies a los fármacos, faise cada vez más necesaria la busca de nueves molécules.

    Los investigadores de la Universidá d'Uviéu empecipiaron en 2007 l'aislamientu de Streptomyces a partir de liquen terrestres y, en 2010, dieron un pasu más al atopar poblaciones d'estes bacteries n'ecosistemes d'algues nes sableres de Xixón. Estos primeros nicios animáron-yos a buscar estos microorganismos en medios marinos más fondos del Cantábricu. Foi según en 2012, al conocer les espediciones del proyectu DOSMARES al Cañón d'Avilés, los científicos pónense en contactu col ecólogu marín José Luis Acuña, quien los convidó a participar na campaña BIOCANT3 na primavera de 2013. Esi mesmu añu empezaron a aisllar les primeres actinobacteries nes precipitaciones d'agua, xarazo y nieve cayíes n'Asturies.

    La profesora Gloria Blanco destaca'l llabor d'equipu de profesionales de distintes árees de conocencia de departamentos de la Universidá, como Bioloxía Funcional, Bioloxía d'Organismos y Sistemes, ya Inxeniería Química y Tecnoloxía del Mediu Ambiente. Participen tamién especialistes del Hospital Universitariu Central d'Asturies (HUCA), Hospital de Cabueñes y Centru d'Esperimentación Pesquera del Principáu. L'estudiu enmárcase dientro de les llínees d'investigación del Observatoriu Marín d'Asturies (OMA) sobre la esploración de la vida marina del Cantábricu y l'esplotación de los sos recursos naturales. El OMA inscríbise nes iniciatives puestes en marcha dende'l Campus d'Excelencia Internacional de la Universidá d'Uviéu. Esti últimu añu, los investigadores establecieron amás un marcu de collaboración cola Fundación Medina, Centru d'Excelencia de Melecines Innovadores, de Granada, pa determinar la estructura molecular de los productos naturales y establecer asina la so posible novedá.

    Artículu

    Atmospheric Dispersal of Bioactive Streptomyces albidoflavus Strains Among Terrestrial and Marine Environments.

    Microb Ecol. DOI 10.1007/s00248-015-0654-z

    Aida Sarmiento-Vizcaíno, Alfredo F. Braña, Verónica González, Herminio Nava, Axayacatl Molina, Eva Llera, Hans-Peter Fiedler, José M. Rico, Lucía García-Flórez, José L. Acuña, Luis A. García, Gloria Blanco.

    Imaxes:


Buscar