Noticias

  • La Universidá d'Uviéu rexistra un aumentu na llegada d'alumnos procedentes de China

    18 de Setiembre 2015

    Los estudiantes asiáticos escueyen preferentemente másteres universitarios en Llingua Española y Llingüística, Economía, y Dirección y Planificación del Turismu

    Los 39 estudiantes procedentes de les universidaes chines, más trés llectores, fueron recibíos esti xueves poles autoridaes universitaries que constataron un aumentu de la llegada d'alumnos procedentes del xigante asiáticu.

    Ye Tian confía en que los estudios que sigue na Universidá d'Uviéu ábran-y les puertes d'un bon trabayu nel so país si, finalmente, nun se queda a vivir n'Asturies. Esti mozu alumnu forma parte de la comunidá d'estudiantes chinos que van cursar na institución asturiana d'enseñanza cimera títulos de grau o de máster universitariu. Toos ellos, 39 n'anguaño académicu, fueron recibíos esti xueves poles autoridaes universitaries que constataron un aumentu de la llegada d'alumnos procedentes del xigante asiáticu.

    Ye Tian deféndese yá abondo bien n'español. Asistió a clases na Casa de les Llingües que lu van ayudar a sortear les dificultaes idiomátiques nos sos estudios de llingüística. ¿Por qué la Universidá d'Uviéu? "La ciudá ye maraviyosa, la universidá tien bon ambiente d'estudiu y el profesores son bien atentos", comenta esti estudiante. Ye Tian sorraya les enormes diferencies ente les universidaes del so país y la d'Uviéu. "Equí, el profesores son atentos y allegres en clase; en China, son serios y ríxidos. Cuando estudio equí siéntome feliz", afirma. Esti mozu chinu confía en rentabilizar los sos estudios cuando torne al so país. "Ellí hai pocos estudiantes que cursen español y ye bien útil pa llograr un trabayu", afirma.

    Con más dificultaes idiomátiques, esprésase Zhang Meng Hang, qu'acaba de llegar a Asturies acompañada d'un preséu de música tradicional china del que nun se dixebra. "Vengo estudiar español y a conocer la cultura española", comenta. "Quixi traer un preséu antiguu por que se conoza que la música nun tien fronteres", comenta.

    Los 39 estudiantes procedentes de les universidaes chines, más trés llectores, fueron recibíos per Cuadonga Betegón, vicerrectora de Internacionalización y Posgráu, y Alberto Fernández Costales, director de Relaciones Internacionales pa Iberoamérica, Restu del Mundu y Cooperación al Desenvolvimientu. Tamién Vicente Gotor, el rector, quixo averase hasta la sala onde tuvo llugar l'actu de bienvenida, nel edificiu históricu, pa deseya-yos una bona singladura nos sos estudios.

    Betegón sorraya que l'interés de los alumnos chinos pola universidá asturiana ye creciente, ello ye que los 39 estudiantes que van cursar títulos de grau o máster universitariu suponen el récord históricu dende 2009. La vicerrectora de Internacionalización esplica que, mientres el so primer añu d'estancia n'Asturies, los alumnos chinos tomen clases d'español na Casa de les Llingües y escueyen de la mesma delles asignatures de grau. Cuando terminen esti primer añu d'adaptación, completen un máster universitariu pa llograr un títulu.

    Les especialidaes que más atraen a los alumnos d'esti país son Llingua Española y Llingüística, Economía, y Dirección y Planificación del Turismu. La medría d'estudiantes procedentes de China ye consecuencia, según la vicerrectora, d'un llabor de captación in situ que s'enllarga yá dende va años. Les autoridaes académiques d'Uviéu estrecharon les sos relaciones con universidaes chines pa fomentar precisamente la llegada de los sos alumnos a Asturies. Estos llazos con instituciones d'educación cimera intensificáronse desque en 2009 como resultáu de delles acciones del Campus d'Excelencia Internacional como'l programa Ástur-China Bridges.

    En total, nesi cursu académicu, la Universidá d'Uviéu recibe alumnos de les siguientes instituciones:

    • 19 de la Universidá de Shandong Weihai.
    • 3 de la Universidá Normal de Shandong.
    • 2 de la Universidá de Lin Yi.
    • 9 de la Universidá de les Muyeres.
    • 6 del Institutu Tecnolóxicu de Beijing.
    • 2 Llectores de Beijing.
    • 1 Llector de Lin Yi.

    Imaxes:


Buscar