Noticias

  • La Universidá d'Uviéu abre un nuevu cursu académicu con nuevos itinerarios billingües y un grau ‘online'

    03 de Setiembre 2015

    El rector reivindica'l papel de la institución académica como elementu clave nel futuru d'Asturies y pide un Pactu d'Estáu qu'alloñe a la universidá de los vaivenes políticos

    Un momentu de la inauguración oficial del cursu nel Paraninfu.

    La Universidá d'Uviéu empecipia un nuevu cursu académicu nel que, ente les novedaes destaquen dos nuevos graos billingües, el de Maestru n'Educación Primaria y el d'Inxeniería de Tecnoloxíes Industriales, qu'alcen la cifra total a 17 itinerarios con docencia n'inglés, y el primer grau que la institución imparte totalmente online: Xestión y Alministración Pública a Distancia.

    A la espera del entamu de les clases, el próximu 9 de setiembre, el Paraninfu sirvió d'escenariu pal actu solemne d'inauguración del cursu 2014-2015, con más de 120 doctores revistíos y numberoses autoridaes polítiques y académiques, según representantes de la sociedá asturiana. El secretariu Xeneral, Ignacio González del Rei, abrió les intervenciones con una repasada a los principales datos del pasáu cursu na tradicional memoria académica, ente que l'encargáu de pronunciar la llección inaugural foi José Antonio Cecchini, catedráticu de Didáctica de la Espresión Corporal, sol títulu El deporte y l'educación en valores.

    Nos discursos institucionales, el rector de la Universidá d'Uviéu, Vicente Gotor, repasó los principales finxos consiguíos nos sos daqué más de siete año al mandu de la institución académica, y encetó dalgunos de los retos que tien per delantre la universidá como institución d'educación cimera. Destacó ente los oxetivos, l'impulsu que tien de tener el mecenalgu como vía de captación de fondos esternos. Y señaló tamién, en materia de financiamientu, que queda pindiu la firma del contratu-programa.

    El rector reivindicó'l papel de la Universidá d'Uviéu como elementu clave nel futuru d'Asturies, y reclamó a les instituciones y al sector empresarial que tengan en cuenta a la institución como motor de desenvolvimientu rexonal. Solicitó, amás, un Pactu d'Estáu pola Educación qu'implique alloñar la educación cimera de los vaivenes políticos".

    Pela so parte, el presidente del Principáu, Javier Fernández, eponderó les ventayes del entendimientu a lo llargo d'estos años ente'l Gobiernu rexonal y l'Universidá, y señaló que'l sofitu de l'alministración rexonal "non flaqueará", tantu p'ameyorar la ufierta educativa como pa reforzar el financiamientu de la investigación.

    Les clases pa los estudiantes van dar empiezu la próxima selmana, magar los alumnos de nuevu ingresu asisten dende'l día 2 a les Xornaes d'Acoyida nos distintos centros. Amás, la Universidá abrió un nuevu plazu de matrícula en titulaciones de grau qu'entá disponen de vacantes, hasta que se cubrir toles places o con fecha llende'l 30 de setiembre, ente que'l vienres 4 de setiembre remata'l periodu de matrícula en másteres universitarios y en programes de doctoráu.

    Imaxes:


Buscar