Noticias

  • Alicia Castro Masaveu toma posesión como presidenta del Conseyu Social de la Universidá

    30 de Xineru 2012

    L'actu, celebráu nel Paraninfu del Edificiu Históricu, cuntó cola presencia del Rector, el presidente del Principáu y la conseyera d'Educación y Universidaes.

    Alicia Castro Masaveu

    Alicia Castro Masaveu tomó posesión esta mañana del so cargu como nueva presidenta del Conseyu Social de la Universidá d'Uviéu nun senciellu actu celebráu nel Paraninfu del Edificiu Históricu al qu'asistieron xuntu al rector, Vicente Gotor, el presidente del Principáu, Francisco Álvarez-Cascos, y la conseyera d'Educación y Universidaes, Ana Isabel Álvarez.

    En tomando posesión del so cargu, Alicia Castro dirixiose a los asistentes pa señalar el so "absolutu compromisu cola comunidá universitaria y coles sos esmoliciones y moliciones". Castro Masaveu confesó la so "rebeldía contra'l rumor que s'estiende perhí de qu'empieza a esistir una xeneración perdida de mozos que pueden cayer en desmotivación y pesimismu al pensar que por enforma que s'esforcien nunca van llograr el so suañu".

    La nueva presidenta del Conseyu Social tendió la mano al rector pa trabayar xuntos por qu'aspeutos tan destacaos como la innovación y les nueves tecnoloxíes dean un pasu alantre na sociedá asturiana de la mano de la Universidá.

    Pela so parte, el presidente del Principáu ratificó "el compromisu inequívocu y la máxima collaboración institucional" del so Executivu para cola Universidá y amosóse confiáu en que'l Conseyu Social ayuda a siguir "el camín de la excelencia y a garantiza la participación de la sociedá na Universidá".

    Precisamente nesi camín de la collaboración y l'integración social afondaron les palabres del rector, Vicente Gotor, quien ufiertó a Alicia Castro tola llealtá institucional y aseguró que la Universidá va siguir cola so política d'austeridá nel gastu y rindición de cuentes tresparente. El rector cerró l'actu aportunando na necesidá de que la sociedá civil amonte la so participación nel financiamientu universitariu y que'l Conseyu Social sía l'interlocutor válidu pa consiguilo.

    Imaxes:


Buscar