Noticias

  • Universidá y Principáu inauguren les nueves instalaciones del Campus de Mieres

    01 de Febreru 2011

    El rector califica de "campus modélicu" el complexu de Barredo, que suma l'edificiu d'investigación, la residencia universitaria y les instalaciones deportives.

    El Rector mientres el so discursu nel actu d'inauguración
    Máximu consensu institucional sobre la relevancia del campus mierense pa la Universidá y pal desenvolvimientu de les Cuenques Mineres. Esi foi l'espíritu que rixó l'actu d'inauguración de les nueves instalaciones del complexu de Barredo que'l rector Vicente Gotor calificó como "campus modélicu".

    La inauguración cuntó con representantes de toles instituciones implicaes nel proyectu. L'alcalde de Mieres, Luis María García, abrió la vez d'intervenciones definiendo'l Campus y la so ampliación como "el proyectu más emblemáticu d'esi procesu de reactivación de les Cuenques Mineres". García afirmó que'l desenvolvimientu del Campus de Barredo representa un proyectu vivu que xenera ilusión na sociedá mierense y concluyó diciendo que les instalaciones universitaries convirtieron yá al conceyu y a la so contorna nun referente formativu y d'investigación.

    Pela so parte, el xefe d'Área d'Infraestructures del Institutu pa la Reestructuración de la Minería del Carbón y Desenvolvimientu Alternativu de les Cuenques Mineres, Manuel Gómez-Cano, valoró los esfuerzos colectivos que fixeron posible la consecución d'esti proyectu. Una iniciativa que se traduz, según afirmó, en "una meyora sustancial de les condiciones de vida nel ámbitu de les Cuenques Mineres". Gómez-Cano destacó que "la formación pa un país ye lo más importante" y, nesti marcu, mentó la posibilidá de desenvolver futures collaboraciones ente la so Institución y el Principáu d'Asturies.

    El rector de la Universidá d'Uviéu destacó que'l proyectu del Campus de Mieres representa una meyora de futuru". Una iniciativa colectiva, non exenta de dificultaes, que llegó a bon puertu "gracies a la cooperación institucional". Por eso'l rector dedicó bona parte de la so intervención a estimar los esfuerzos de tolos participantes: instituciones, sindicatos mineros y ciudadanía, destacando'l llabor de los sos predecesores nel Rectoráu y el papel del personal del Campus de Mieres.

    Gotor afirmó sentise honráu d'avanzar nun campus que "ye más qu'un centru docente ya investigador". Pal rector les instalaciones de Barredo conformen lo que tien de ser un "campus modélicu". El rector faló tamién de futuru y confirmó la implantación el próximu cursu del Grau n'Inxeniería Civil, la única nueva titulación que va poner en marcha la Universidá d'Uviéu. Finalmente, confió en que, ente toos, "consigamos enllenar esti campus de cazumbre nueva, qu'actúe d'elementu tresformador" y que sía un llugar onde "crezan les idees, la conocencia, la innovación y la cultura entamadora que precisen les Cuenques Mineres y Asturies".

    La intervención de zarru corrió a cargu del presidente del Principáu. Vicente Álvarez Areces destacó que la inversión de 133 millones d'euros realizada nel Campus dende los sos entamos convirtió al de Mieres en "unu de los meyores d'España por calidá y ufierta de servicios". Calificolu amás como "la espresión del compromisu cola investigación y l'innovación" como factores de desenvolvimientu de les Cuenques Mineres.

    Álvarez Areces resaltó la "intelixencia y altor de mires" que demostraron les organizaciones sindicales al tresformar el duru proceso negociador de la reconversión del sector del carbón nun elementu de reactivación territorial, lo que los convierte na so opinión en "precursores" de los postulaos que defende la Europa d'anguaño. El presidente emponderó al Gobiernu central por dar soporte económicu a estes inversiones y al Conceyu de Mieres por integrar toles actuaciones nel so desenvolvimientu urbanísticu. Aprovechó coles mesmes la mención al ámbitu municipal pa encamentar al abandonu de conceutos localistes y entender el valor de la ufierta universitaria qu'apurren los distintos campus pa toa Asturies.

    La comitiva percorrió parte de los trés edificios inauguraos, que sumen 18.400 metros cuadraos construyíos. El centru d'Investigación cunta con ocho pisos d'altor. Amás d'espacios propios pal llabor investigador y recursos complementarios (salón d'actos, aules, biblioteca). Esti inmueble va ser la sede del Institutu Universitariu de Recursos Naturales y Ordenación del Territoriu (INDUROT) –que yá ocupó los sos espacios--, del Institutu Cantábricu de Biodiversidá, del Centru Européu de Soft Computing, el Cluster d'imaxe dixital, un viveru d'empreses y del futuru Centru de Supercomputación.

    La Residencia Universitaria cuenta con habitaciones individuales y apartamentos con capacidá p'agospiar 120 persones. Les instalaciones deportives disponen de campu de yerba artificial de fútbol 7, dos pistes de tenis, cuatro de paddel, circuitu de footing y un pabellón cubiertu con pistes multiusos, sales polivalentes, sauna, ximnasiu, vestuarios y graderíu pa 700 espectadores.

    Imaxes:


Buscar