Noticias

  • La Universidá va dar accesu directu al doctoráu a los titulaos superiores anteriores al Plan Bolonia

    10 de Abril 2014

    Los egresados de planes antiguos de segundu ciclu o ciclu llargu que deseyen empecipiar estos estudios nun van tener que cursar un máster universitariu

    La Universidá d'Uviéu va dar accesu directu a los estudios de doctoráu a aquellos titulaos cimeros que los sos planes d'estudiu cunten con siquier 300 creitos ECTS. Esta midida, aprobada güei pola Comisión de Doctoráu, va dexar que los titulaos cimeros que remataron la so carrera antes de la implantación del Plan Bolonia puedan cursar un programa de doctoráu ensin tener que completar antes estudios de máster universitariu. La puesta en marcha del Espaciu Européu d'Educación Cimera estableció como pasu previu imprescindible al doctoráu superar un cursu d'un máster universitariu.

    El pasáu mes de marzu'l Ministeriu d'Educación, Cultura y Deporte publicó una nota que dexaba en manos de les universidaes la interpretación de les condiciones d'accesu a los estudios de doctoráu pa los titulaos de los vieyos planes de segundu ciclu o ciclu llargu. La Comisión de Doctoráu ta integrada por miembros del equipu de gobiernu de la Universidá y 15 profesores qu'actúen como ponentes de toles cañes de conocencia.

    Según l'Alcuerdu de la Comisión de Doctoráu, los comenenciudos van tener que cursar obligatoriamente los complementos de formación sobre metodoloxíes d'investigación que determine la Comisión Académica del correspondiente programa.

    El Centru Internacional de Posgráu de la Universidá d'Uviéu va ufiertar pal próximu cursu 24 programes de doctoráu, diez d'ellos con una Mención escontra la Excelencia, en toles cañes de conocencia. Más de 800 alumnos tán cursando estos estudios na actualidá.

    Accesu pa los diplomaos ya inxenieros técnicos

    Quien tean en posesión d'una titulación universitaria oficial española llograda conforme a ordenaciones universitaries anteriores al Real Decreto 1393/2007, estructurada nun ciclu y con una carga inferior a 300 creitos LRU, namá van poder aportar a un programa de doctoráu nel casu de que superaren siquier 60 ECTS d'un Máster Universitariu y que la suma de creitos LRU y/o ECTS superaos nel conxuntu de los sos estudios universitarios oficiales sía igual o superior a 300.


Buscar