Noticias

  • 30 investigadores empecipien una nueva campaña d'esploración del Cañón d'Avilés

    24 de Setiembre 2012

    Los científicos de la Universidá d'Uviéu, el Centru d'Investigación Pesquera del Principáu, la Universidá de Barcelona y el CSIC embarquen nel buque oceanográficu Sarmiento de Gamboa

    Una rede MOCNESS pa la recoyida d'organismos planctónicos, dispuesta pa ser arriada mientres la campaña BIOCANT 1 en Marzu de 2012 (fotografía tomada del blogue del profesor Acuña: http://joseluisacuna.wordpress.com/).

    L'estudiu del gran cañón submarín d'Avilés (Asturies) entra nuna nueva fase, col entamu'l 24 de setiembre de la campaña BIOCANT 2. Una trentena d'investigadores pertenecientes a la Universidá d'Uviéu, el Centru d'Investigación Pesquera del Principáu d'Asturies, a la Universidá de Barcelona y al CMIMA/CSIC y, como científicos invitaos, personal del Institutu Español d'Oceanografía y collaboradores del institutu GEOMAR de Kiel (Alemaña) van realizar nueves midíes y recoyíes d'amueses, a bordu del Buque Oceanográficu Sarmiento de Gamboa.

    Ente los investigadores atopen dellos estudiantes doctorales y ocho estudiantes del máster internacional Erasmus Mundus de Biodiversidad Marina y Caltenimientu (Marine Biodiversity and Conservation), nel que participa la Universidá d'Uviéu so la coordinación de José Luis Acuña. La campaña cunta col sofitu y asistencia técnica de la Unidá de Tecnología Marina del CSIC, y tien dos partes:

    • La primera, ente'l 24 y el 29 de setiembre, ta coordinada por Antoni Calafat, de la Universidá de Barcelona, y céntrase na recuperación y reemplazamiento de fondeos instrumentados en diversos puntos del Cañón. Esos preseos lleven recoyendo midíes y amueses desque fueron emplazados mientres l'anterior campaña, BIOCANT 1, en Marzu de 2012, y van ser otra vegada emplazados por que sigan rexistrando hasta Marzu de 2013.
    • La segunda fase de la campaña, ente'l 30 de setiembre y el 7 d'ochobre, va ser coordinada por José Luis Acuña, de la Universidá d'Uviéu, y va centrase na recoyida d'amueses biolóxiques, col enfotu de rexistrar cambeos con respectu al muestreo d'iviernu nes comunidaes fondes del Cañón, esto ye, trátase de detectar la estacionalidad iviernu-branu.

    Mientres la campaña utilizarán sistemes de muestreo d'agua según diversos tipos de redes peláxiques y dragues de fondu. Les resultancies del proyectu DOSMARES recibieron apocayá atención en tol mundu dempués de la publicación d'un artículu na prestixosa revista Nature. DOSMARES ye una collaboración ente la Universidá de Barcelona, el CSIC, el Centru d'Esperimentación Pesquera del Principáu y l'Universidá d'Uviéu, empobináu al estudiu comparativu de los grandes cañones submarinos d'Avilés y Blanes.


Buscar