Noticias

  • La Universidá d'Uviéu lidera una investigación que desvela les claves del ésitu evolutivu de les aguamales

    15 de Setiembre 2011

    El trabayu, que publica la prestixosa revista ‘Science', revela qu'estos organismos compiten colos pexes n'igualdá de condiciones magar ser ciegos, lentos y bien antiguos.

    Los investigadores, José Luis Acuña y Ángel López Urrutia. Foto: Acuña

    Investigadores de la Universidá d'Uviéu y del Centru Oceanográficu de Xixón (Institutu Español d'Oceanografía), en collaboración cola Roger Williams University, desvelen les claves evolutives de les aguamales nuna investigación que publica la revista Science. El trabayu, financiáu pol Ministeriu de Ciencia ya Innovación al traviés del proyectu CONSOLIDER Malaspina 2010: Espedición de Circunnavegación, Cambéu Global y Esploración de la Biodiversidá del Océanu Global, demuestra cómo les aguamales evolucionaron aumentando'l conteníu d'agua nos sos texíos, lo que les fixo grandes y xelatinoses, y unos cazadores escepcionalmente efectivos.

    José Luis Acuña, profesor d'Ecoloxía, investigador y director del Máster Erasmus Mundus en Biodiversidad Marina y Caltenimientu de la Universidá d'Uviéu; Ángel López-Urrutia, investigador del Centru Oceanográficu de Xixón-IEO; y Sían Colin, profesor de la Roger Williams University de EE UU, son el autores del estudiu, que supon la primer teoría, basada en datos esperimentales, qu'esplica la estratexa evolutiva siguida poles aguamales y el delicáu equilibriu que les xune a los pexes, colos que compiten n'igualdá de condiciones magar ser los primeros depredadores ciegos, lentos y antiguos.

    "Ente que los pexes desenvolvieron una gran agudez visual pa detectar a les preses, les aguamales dependen d'un sistema primitivu basáu nel contactu directu cola presa. La clave del so ésitu anicia en que, al aumentar el tamañu del so cuerpu, mueven una mayor cantidá d'agua y abasnen a más preses escontra los sos tentáculos", afirma José Luis Acuña, primer firmante del artículu. "Tratar d'una estratexa efectiva siempres que la velocidá de natación de l'aguamala sía abondo lenta", señala Ángel López-Urrutia.

    La investigación, sofitada pol Campus d'Excelencia Internacional de la Universidá d'Uviéu y cola collaboración del Acuariu de Xixón na aportación de material d'estudiu, confirma que la sobresplotación de los stocks pesqueros puede derivar nun cambéu del ecosistema marín que favoreza la espansión de les aguamales frente a los pexes. Les aguamales son unos depredadores tan eficaces como los pexes, polo que "tán preparaes pa ocupar el papel de los pexes ante la sobresplotación o cualesquier otru dañu que sufran les poblaciones d'estos postreros", aseguren.

    Col fin de valorar la eficacia nel llogru d'alimentu, el investigadores tuvieron en cuenta la distinta densidá corporal de materia orgánico d'aguamales y peces; y repararon que, cuando se comparen organismos cola mesma cantidá de materia orgánico, la tasa de depredación ye la mesma n'aguamales y peces. "Técniques alométricas como les qu'apliquemos, que tienen en cuenta'l tamañu y la temperatura de l'agua na que viven, dexen analizar con un altu nivel de precisión el gastu enerxéticu y la capacidá d'alquisición d'alimentu de distintos organismos", afirma Ángel López-Urrutia.

    Pa llegar a estes conclusiones, Acuña y López-Urrutia cuntaron cola collaboración de Sían Colin, de la Roger Williams University de EE UU, especialista na natación y l'alimentación de les aguamales. El investigadores arrexuntaron datos d'alimentación, respiración y natación d'aguamales, peces, y les sos preses, que combinaron con ecuaciones biomecániques pa producir una síntesis que aúna esperimentación y reflexón teórica.

    Imaxes:


Buscar